Tuesday, September 30, 2008

قديمه شويه ... بس تنفع ( ذكرياتنا فى المعموره







احلى حاجه في الدنيا لما تكون مع ناس بتحبهم وبيحبوك
ومكنتش تتخيل في يوم انك تقضى معاهم اسبوع كامل سوا سوا
ليل نهار ونهار وليل مع بعض
الاحداث دى كانت في شهر سبعه
تقريبا كدا 25 سبعه

ممكن اقول عليها من احلى الايام اللى قضيتها في حياتى
وسبحان الله جت صدفه كدا ولا في ترتيب ولا حاجه

بيكتبلكوا التدوينه دى 3 أشخاص ( سمر وأسماء وريهان
كنا كتبناها مع بعض وقتها
واتفقنا هننزلها على مسلمه
خلوكوا معانا


*****

( سموره بتحكى )

انا قاعده دلوقتى انا واسماء وريهان على البلاج
بنحكى وبنرغى وبنقزقز لب
قررنا لازم نكتب تدوينه نحكى فيها عن حاجات كتير حصلت
بجد احنا مبسوطين اوى ولازم نشارككم معانا بسطتنا
:D
سمر تعالى نحكى على الملاهى
لا نحكى يوم ما اتمشينا بالليل ع البحر يا اسماء
لا يوم السينما
لا يا ريهان نحكى على يوم ما اتقابلنا

اوووووووووووك
هبدأ انا بقى

****

اللقـــاء
( أسماء )

كنت واقفه في الشباك
لقيت من بعيد اتنين كدا جايين
قلت في عقل بالى ايه دا
مستحيل يعنى
كنت متأكده ان اللى ناحيه اليمين دى ريهان
انما اللى في الشمال دى
متوقعتهاش خاااااااالص
لما دققت شويه افتكرت الهدوم اللى هى لبساها
يانهار ابييييييض
ايه دا
دى هى
دى سمررررررررررررررر
يا جــــــــــــــزم
اطلعوا اطلعوا

***
( سمر )
آآه أصل انا كنت عملاها موفاجأه لاسماء
كنت قايلالهم ان اختى رايحه وممكن اجى معاها
بس كان عندنا حاجات في جيان وكنت عاوزه اقعد
بس في الاخر قلت اسافر وابقى ارجع بقى قبل ما التصوير يبدأ
لقيت ريهان بتكلمنى وبتقولى مش هتيجى بقى ولا ايه
قلتلها يا بنتى انا خلاص في المعموره
طبعا البنت مصدقتش نفسها
واتفقت انا وهى اننا مش هنقول لاسماء عشان نعملهالها مفاجأه
ابيه محمد وصلنى وقابلت ريهان عند زهران ماركت
وروحنا على سمكه

***

(ريهان )

طلعنا لاسماء انا وسمر
وأسماء خدت منى جرنال كنت جيباهولها
من كتر الثقافه ياعينى قالتلى اشتريهولها وانا جايه
خدته وقعدت تقرا فيه ولا كأن في كرنبتين واقفين والمفروض تسلم عليهم
يالا فيها الخير
بعد كدا سلمت على سمر وكالعاده هزأتنى عشان مقلتلهاش ان سمر جت
ضحكنا
وهزرنا
وصلينا المغرب مع بعض وعمو صلاح _ بابا اسماء_ خرج سلم علينا
وقال لاسماء تجيبلنا حاجه نشربها وتبقى تاخد حسابها منى قبل ما امشى
كان مخنوق منى اوى وبيقولى مش كفايه القاهره
هلاقيكى هنا كمان
يا ساتر
قعد يحكى لسمر عن التليفونات بتاعتى انا واسماء ويقولها
ان هو صاحب التليفون ومبيعرفش يتكلم فيه
المهم
قعدنا شويه في البلكونه
وبعدين نزلنا نتمشى
وكنا بنتكلم في موضوع واحد بس
لا ياربى كانوا موضوعين
لالالا
3
3 مواضيع
وأظرف حاجه
اننا كنا بنتكلم في ال 3 مواضيع في وقت واحد
مش نقفل موضوع ونتكلم في التانى
لا مع بعض
مش عايزين نضيع وقت

***

( ريهان برده )


مش عارفين نعمل ايه ولا ايه
أخيرا
قررنا اننا هنروح الملاهى ( ملاهى المعموره





كالعاده أتأخرت على اسماء وسمر وهما راحوا منغيرى
المهم قابلتهم وقلتلهم ها هنركب ايه
بصيت لأسماء نظرة تحدى
وقلتلها تيجى ؟؟؟
قالتلى ماشى يا وحش يالا
طبعا كنا مرعوبين
والأخت سمر لقيناها بعدت بعيييييييييييييييييد
وقالت أبدا
قلتلها طيب يا سمر جربى
تقولى هى بتوجع ؟؟؟
بتوجع ايه يا بنتى هى حقنه
المهم ركبنا انا واسماء واسراء
كالعاده أستندلت مع اسماء
عشان كانت عاوزه تقعد فى مكان كده
اول لما طلعت قعدت فى المكان ده
نزلنا كتفنا مش حاسين بيها
وفضلنا يومين بعديها بالمنظر ده

وسمر تبصلنا وتضحك وتتريأ علينا


نيجى للتوب سبين
ها يا سمر هتركبى
مش عارفه
انا خايفه
هى بتوجع ؟؟؟؟
يادى بتوجع اللى انتى مسكهلنا من اول اليوم
طلعناها بالعافيه
وبعد ما طلعنا وخلاص اللعبه هتشتغل
تنادى ع الراجل وتقوله نزلنى
نزلنى مش راكبه
المهم اللعبه بدأت

واستمتعت جدا
والدور كان شغال وهى تقولى انا مش خايفه خالص
وهى مش بتوجع على فكره
الحمد لله ياسمر انها مش بتوجع


وأخيرا السفينه
لعبه سخيفه جدا
وكملت بأن أمنية السيسى قعدت جنبى فيها
فضلنا فى الأول نضحك وكده
وفجأه لقيت راس أمنيه اترزعت على كتفى
فضلت أفوق فيها
وأقولها انتى بجد أغم عليكى ولا بتشتغلينى
بعدها فضلت تعيط قلت لا ده بجد
أمنيه فوقى
ياعم وقف
والراجل بيبتسم
كأن ده عادى ( عدى علينا كتير )
وفاقت أمنية
طبعا معانا شىء ذنان اسمه سمر
يالا بقه عشان خالو هيزعق



أسماء تقولها فى ايه يا سمر انتى قارفانا هنا وهناك
المهم طبعا اضطرينا كلنا نروح عشان الهانم مش هتمشى لوحدها
سبقت انا وسمر
وأسماء مشيت مع أخواتها
بقولها يالا يا سمر سلام بقه عشان انا هدخل سينما
قالتلى متأخر كده
قلتلها اه ماهو ابن خالتى معانا
يااااااااه يا بختكو
بكلم محمد
يالا يا محمد أجهز عشان ننزل
لا مش قادر خلاص بقه خليها يوم تانى
واتفركش الموضوع
كل ده بسبب ان سمر بصلتنا فى الخروجه


وصلنا عند سمر البيت
وقفت انا واسماء نرغى مع أختها شويه
وعكينا أخر حاجه
فاكرين لما سمر جابت فى ماده 4 من 30
أتريها مكنتش قايللهم
بس احنا طبعا قمنا بالواجب و قلنا كل حاجه
وأختها كانت مفروسه منها جدا
طيب يالا يا سمر
ليله سعيده
مشيت انا واسماء وبنضحك على عكنا
وقلنا هنتصل بسمر الصبح نطمن عليها عشان شكل اختها مكنش مطمنا


*****
(سمر)

فى السينـــما




يوم السينما بقى
كان يوم شديد
تخيلوا
داخلين حفله 12
وخارجين 2 وشويه
:D
قبلها كنا في سيبر
اول مره ندخل سيبر غير سيبر الكليه
لو نعرف ان المصيف بيعمل كدا
بس يالا
كان في حاجه كدا وكان لازمن نخلصوها
فريق الانتقام المروع كان بيستعد

دخلنا فيلم حسن ومرقص
الفيلم كويس والله
كنت قاعده جنب اسماء وورانا عمو صلاح ووراه بقى الست ريهان
كنت باكل انا واسماء حاجه غريبه كدا مش فكراها
السينما ذات نفسها بقى
رديئه رديئه رديئه
كأنك قاعد في صالون بيتكوا بالظبط
ياربى
ولا في تكييف
والجو حر

والكراسى بلاستيك
وكلها جنب بعض
وشاشه العرض جايه من القرن ال 18 ووقعت في القرن ال 21 غلط

عمو صلاح جايلى صوته من ورا بقى
كل شويه

( منك لله يا ريهان)

( منك لله يا ريهان )
بنفس اسلوب الراجل اللى كان في فيلم جاءنا البيان التالى
حسبى الله ونعم الوكيل

الجمله طالعه من قلبه من قلبه يعنى
:D
خرجنا من السينما
قعد يقولها يابنتى السينما دى كانت قهوه زمان
ياريتنى ما سمعت كلامك
(منك لله يا ريهان )
فضل طول المصيف كل ما يشوفها يفكرها بالسينما

لقيت عماد ابن خالى بقى واقف مستنينى
اشتريت انا وهو برنيطه ليا
وخدنى وروحنا
كان واقف مستنينيى بالعربيه
وهو اصلا لسه متعلم السواقه يدوب
كملت معاه مسيره الملاهى بفى
:D

***

ع البحر
( أسماء بتحكى )


ع البحر بقى كانت احلى قعده
كنت بروح انا وسمر بدرى وريهان كانت بتحصلنا
قريت لسمر حاجات كدا كنت كتباها
وهى قريتلى حاجات كدا كانت كتباها
ورغينا عن حاجات كدا كانت جوانا
وجت ريهان ورغت معانا
عادى بقى بحر كدا وسما وشمس ومحدش معانا
:D
:D
ركز وا بقى كدا
امنيه اختى طلعت سندوتش من الشنطه
عادى يعنى
واحده جعانه وهتاكل
بتقول لريهان
ريهان امسكى السندوتش دا
ترد ريهان
لا لا يا امنيه مش عايزه
امنيه تديلها السندوتش وهى مستغربه
ترد ريهان
لا يا بنتى والله ما عيزه
حتى يا ربى مش مديه فرصه لامنيه انها تتكلم
امنيه تقولها يا بنتى بقولك امسكيه بس
تقولها مش جعانه والله انا لسه واكله
الله يخربيت كدا بقولك امسكيه على ما اقفل الشنطه متاكليهوش
انا اللى هاكله وربنا يا ريهان
فين وفين بقى على ما ريهان فهمت
ذكيه من يومها
بابا كلملنا مى وقعدنا نغيظها
والبنت خلاص يعنى كانت هتعيط
كان نفسنا بجد تكون معانا

كانت هتعمل جو جديد خالص
بس سبحان من جمعنا من غير معاد كدهه
دا دليل على ترابط القلوب والله
العيال دول انا بحبهم بجد بجد بجد
في اليوم دا بقى سبحان الله سبحان الله بجد
روحٌنا
لقينا الغدا عند كل واحده فينا سمك
:D:D
جميله والله الصحوبيه


****

ريهان بقى كانت اول واحده روحت
بعدها انا
بعدها السوسه اسماء
واخده حقها كدا في كل حاجه
:D
بس كان اسبوع متعه

احلى ما فيه انه جه من غير ترتيب

تلاقيكوا بتدعوا علينا بعد التدوينه الطويله العريضه دى

:D
معلش
تعيشوا وتقروا

ونختم كلامنا ببيت شعر كتبته غفير الشعراء ( على راى ريهان

سمر ماهر

كانت بتقول

سمر وأسماء وريهان

تلت قطع سكر فى كوبايه شاى

مع السلامه بقى عشان احنا انهارده العيد وماما لو شافتنى ع الكمبيوتر هتحطنى فى الخلاط

كل سنه وانتوا طيبييييييييييييين

10 comments:

Anoon said...

بما انى كنت معاكو ( وياريتنى ما كنت معاكو ) فا أكتر حاجه فاكرها هى الحقنه ( قصدى بتوجع ) مش ممكن كلمه ملهاش اى معنى :D وبعدين برده الأخت سمر بصتلنا فى خروجة السينما الله يباركلها ملحقتش تكمل الكلمه والخروجه أتكنسلت :S

سمـــر مــاهر said...

:D
لا كدا حرام بقى
هو محمد اصلا كان مقرر انه مش هينزل
انتوا اللى قاعدين تتفزلكوا
وتجيبوها فيا فى الاخر

ماشى يا نهله
( بنت خاله ريهان )
انتى مفروض تصلى ركعتين شكر لله انك شوفتينا على فكره
وحشانى جدا يا انون
انا مبسوطه انى اتعرفت عليكى بجد
يالا كل معموره واحنا طيبين
:D

Anoon said...

ana kmaan etbasst walahii eny et3rftt 3lekoo aweeeeee bgddd w sallleet ya samoorr salleet kteerr msh rak3ten bss :D isA elsana ely gaya nt2abl tane w sodfa brdo 3shan tb2a 7elwa kda ;)

Anonymous said...

فقريات من يومكم
:D :D :D

أحمد عبد القوي said...

ربنا يخليكوا لبعض ويسعدكم فى حياتكم داااائما ويجعل أيامكم كلها خير وفرحة


فعلا أيام الجامعة دي مش هاتتعوض ، ممكن نكون مش حاسين بيها بس والله كتير جدا بيحسدنا


ربنا يوفقنا جميعا

سمـــر مــاهر said...

ربنا يخليك يا احمد

ربنا يجعلنا صحبه خير
وفعلا زى مانت قلت
ايام الجامعه دى مش هتتعوض
عشان كدا احنا بنستغلها افظع استغلال
:D

Anonymous said...

مدونة ممتازة وخفة دم معهودة في البنت المصرية وعقل راجح عندما قرأت لك ردك على المدون محمد رفعت..
آرائك وخفة دمك وسردك وحكيك يرشحانك أن تكوني كاتبة متميزة بإذن الله

أحمد زكريا منطاوي
صحفي وقصصي

Anonymous said...

قرأت لك بعض الموضوعات ومن بينها ردك على حديقة طفل محمد رفعت وعجبني رجاحة عقلك وخفة دمك..
أظن انك ستصبحين كاتبة متميزة إن أصررت أنت على ذلك.
احمد زكريا منطاوي
صحفي وقصصي

أحمد زكريا منطاوي said...

طبعاً إنتي قلقتي مين منطاوي دا أبو ردين دا كمان !!!
والله النت كان مهيس معايا جداً..
اتعذبت عشان الرد يوصل..
يلله ياعم هيص بقى الردود كترت والرانكينج هيعلى بردو ;)

أحمد زكريا منطاوي said...
This comment has been removed by the author.