Saturday, May 17, 2008

قررت أرتـــب دولاب هدومـــــى




استجابه لمطالب الجمهور واولهم ست الكل بتطبيق دولاب الهدوم الخاص بى
قررنا نحن _ سمر ماهر _ القيام بهذه الخطوه الجريئه
مع الاخد في الاعتبار انه شىء لا يحدث الا كل عام عند تبديل الملابس باختلاف الفصول

في الحقيق لقد سئمت التفكير واحترت كثيرا
رغبه شديده في تغيير نظام الدولاب تراودنى
لن اتعبكم معى فلقد وضعت تصورا معينا في ذهنى
ولن يستغرق هذا وقت في التفكير معكم _ أتحسد _

ولكـــــــــــن
جدير بالذكر انى قررت ان اخصص رفاً كاملا للبيجامه الاخيره التى اشتريتها العام الماضى بمبلغ وقدره
_ لن اخبركم به حتى لا يصاب احد منكم باغماء فورى وضيق تنفس كما حدث لامى _
في حقيقه الامر لقد تحققت ظنون امى بها
فلقد أصبحت كملابس الاطفال نتيجه لغسلها مرتين
لا ادرى من اى قماشه صنعت هذه البيجامه اللعينه
لماذا لم يكتبوا عليها _ غير صالحه للغسيل _

سمر مشوفكيش لبساها ادام حد
حاضر يا محمود دا طبيعى يعنى _ مش طبيعى ولا حاجه _

ولــــــكن


ما حدث قد حدث وانقضى
ولا فائده من البكاء على البيجامه المغسوله
ساضعها في رف خاص بها حتى اتحسر على شبابى كلما نظرت اليها
وهذا أقل عقاب

سأعيد ترتيبه من جديد
سأضع كل شىء بمكانه
ربما تكون خطوه لجعل امى راضيه عنى




بصراحه

كل دا كان فشنك _ ماعدا البيجامه طبعا _

انا مش هرتب الدولاب ولا حاجه
أنا هرتب حاجه أكبر من كدا
كان نفسى اعمل الخطوه دى من زمان بس دايما كنت بقف ومبكملش
ممكن تقولوا قله عزيمه
ممكن تقولوا قله عقل _ مع ان ضروس العقل كلها طلعتلى في اعدادى _
ممكن تقولوا انشغال _ ودا واخد عامل كبير _
ممكن تقولوا مفيش جدوله مفيش نظام مفيش حد كان بيساعدنى

لكن
عاوزه اقول
انى
قررت
ارتب

حيــــــــــــــــاتى

حتى لو هواجه الصعوبات لوحدى
حتى لو كلهم احبطونى وقالولى انى مش هتغير
لا
انا هتغير
هعمل جدول وهمشى عليه
هتحدى نفسى

هنظم وقتى
هخلى حياتى احسن
مش عشانى لوحدى
عشانهم هما كمان
حياتى مش بتاعتى لوحدى
واذا كان انا ليا حق عليهم
فهما ليهم حق عليا

الانترنت مش هياكل وقتى تانى
اذا كان بابا زمان بيشيل فيشه الكمبيوتر من ادامى عشان اقوم اذاكر
وابصله واعيط واقول صدقنى مش هيجيب نتيجه انا عارفه وكنت ببقى مضايقه من نفسى عشان مش قادره اتحكم فيها
الا انه فعلا كان بيجيب نتيجه

كنت بضايق شويه لكن كنت بقوم اذاكر وكأن شيئا لم يكن
وهو دا اللى انا هعمله
اذا كان التدرح مش جايب معايا نتيجه
فأنا هشيل فيشه كل حاجه بتضيع وقتى
واذا ماجبش نتيجه
هفصل الكهربا كلها :D
مش هخلى ماما تقولى تانى
_ اللى كان بيأثر عليكى راح_

انا أدها
ومش هضايقهم منى تانى
_إن لاهلى على حق _


والاجازه جايه ومش هخليها تعدى منى الا وانا مستفيده منها احسن استغلال

بجد
هبطل التفكير في اى حاجه ملهاش لزمه
انا مش ملك نفسى

ومن انهارده

انا
قررت ارتب حياتى

وعقبال الدولاب بقى

وربنا معاكى يا سمر محمد ماهر _ بابا اسمه مركب

الشهيره بسمر ماهر

تجدونى على النت باسم روزاليندا

للاستعلامات اتصل على هاتفى الخاص


13 comments:

فلسطينية الهوى said...

اهم حاجة رتبتي الدولاب ؟

انا النهاردة رتبت الدولاب والمكتبة والاودة

هروبا من المذاكرة

وشكلي هقوم امسح الشقه

سمـــر مــاهر said...

:D

رتبت ايه يا بنتى
منا قلتلك فشنك

هى محاوله للربط بين الامال والطموحات :D
الدولاب دا مثال مصغر

محمد رفعت said...

قرار التغيير
أهم قرار بيتاخد في الحياة كلها
القرار بياخد لحظة
والتنفيذ بيحتاج رحلة طويلة أوي
عالعموم

إذا عزمتي فتوكلي على الله
لكن
أهم حاجة
قبل تغيير السلوك
تغيير المفاهيم

وابقى خدي طلة على تدوينة عبدون في نجوم الحيرة
بعنوان
"أيها الأصدقاء....مادام الأمل طريقا فسنحياه"

Anonymous said...

أنتى لكى عظيم الشرف
إنى أعلق عندك كان نفسى أعمل الحكاية دى من تقريبا سنة فاتت
المهم
إن أكتر حاجة عجبتنى هى الصورة
تفحة جدا جدا جدا
والأهم من الصورة
جملة عجبتنى أوى بردو
إن لأهلك عليك حق
أنا قررت أشاركك قرارك
فى حتة الإجازة بس
يلا أهو كله بثوابه
:)

سمـــر مــاهر said...

محمد رفعت

ربنا يكرمك على التشجيع
لكن ممكن توضيح اكتر للجزء دا

لكن
أهم حاجة
قبل تغيير السلوك
تغيير المفاهيم

؟؟؟

وتدوينه عبدون انا قرتها فعلا من فتره
وادتنى دفعه امل بجد
ربنا يكرمه

سمـــر مــاهر said...

إن أكتر حاجة عجبتنى هى الصورة
تفحة جدا جدا جدا


مين تفحه دى يا فندم

:D:D:D

طيب مش هتقولنا انتى او انت مين يالى ناوى تشاركنى القرار

mohamed said...

اول ما شفت البوست قولت ترتيب ايه ودولاب ايه .. مش عندك امتحانات برضه الأسبوع دا ..

اديكي سبتي الجولاب والبيجاما الاسطورية ..روحي ذاكري بقى

سيبي الافكار الحالمة والتطلعات للتغيير لبعد الأمتحانات :)

صرخة الأقصى said...

روووووووووووووزا يا روووووووووووووووزا

مبروووووووووووووووووك علي العودة للتدوين بعد طول غياب

تدوينة موفقة يا صحبتي

يلا رتبي دولابك وغرفتك كمان بالمرة

ربنا معاكي يا حبي ويجعل حياتك علي الوجه الذى يرضيه عنك

صرخة الأقصى said...

صحيح
نسيت اقولك إن الصورة عجباني أوي موووووووووووت جدددددددددددددددا
آخر حاجة

كفايـة طيبـة said...

اعرف نيتك قبل كلمتك

على اساس انى داخلة اشتمك يعنى ولا ايه :D

احلى حاجة فى المدونة دي ان بين كل بوست وبوست تقريبا كدة سنة ونص ^_^

رتبي ياسمر لعلنا نقتدى بيكي ونشوف ازاى رتبتي دولابك عشان نرتب الاوضة بحالها معاكى..


Mona :)

سمـــر مــاهر said...

محمد

نحن قوم لا تهزنا الجبال العوالى
فكيف بورقه كتب عليها اجب على السؤال الاتى
على راى فرح القلوب
:D
امتحانات ايه
صلى على اللى هيشفع فينا

هو انت جوال على كل الطلبه ؟


صرخه الاقصى
منوره يافندم
الصوره ذوق لان اللى حطتها ذووووق

ودا امر مفروغ منه


اما بالنسبه للتعليق الاخير بتاع كفايه طيبه ومش هقول بتاع منى

فانا عقابا لكاتبته مش هرد عليها

بس هه

ronnata said...

بجد التوبيك شدنى اوى فىالاول
عماله اقول سمر هترتب دولاب اية و بيجاما اية؟
و فهمت بقى بعد كدة
بجد اسلوبك فى الكتابة انا بمووووت فيه يا سمسم
امابالنسبةللقرار التغيير فبجد قرار حلو بس محتاج الدفعة القوية و الاستمرارية
و ربنا يوفقك

سمـــر مــاهر said...

روناتا

ربنا يخليكى يا قمرتى