Sunday, February 1, 2009

يــوم حقنـه الحصبــه ...... علمنـى كـتيـر




احساس ممتع لما تلاقى نفسك فى " لحظه " اتلعمت حاجات ..... مرت عليك سنين وانت بتحاول تتعلمها ..... وفجأه

تلاقى نظرتك للحياه واسلوبك فيها بدأ يتغير وياخد مسار مختلف
وتلاقى شخصيتك بدأت تتطور ويظهر فيها صفات جديده مكنتش فيها .... وتستغرب اوى ازاى " لحظه "
علمتك كل دا .... و تحس انه اكيد فى حاجه غلط ... وتحاول تقنع نفسك انه أكيد فعلا فى حاجه غلط ..... بس تكتشف بعدين انه مفيش " أصح " من كدا .... وتتمنى لو حياتك كلها تبقى زى " اللحظه " دى ....

***
كنت حاسه ان فى حاجه كاتمه على قلبى
من ساعه ماعرفت بموضوع الحقنه دا
استرجعت معاها كل احاسيس الطفوله
واد ايه كنت بتخنق من الحقن وبكرهها
معتقدش ان فى حد فى الدنيا بيحب الحقن
بس درجه الكره بتختلف من حد للتانى





***
كان يوم غريب الاطوار
حصلت فيه حاجات عجيبه
اعجب حاجه فيهم انى اكتشفت وانا فى نص السلم
انى نازله بالارنبين دول مش بالجزمه
:D

( والله اختراع ظريف )

***
دخلت الكليه من هنا
وعينكوا ما تشوف الا النور
كل ما عينى تقع على بنت
الاقيها ماسكه ايديها وبتعيط
مالك يا بنتى ايه حصل ؟؟
الحقنه يا سمرررر آآآآآآآه ايدى بتوجعنى اوى
يانهارررررررررررى كل دا من الحقنه
آآآآآآآآآآه مش قادره بتوجعنى اوووووى

***
قلت عادى يمكن هى عندها حساسيه ولا حاجه
واقفه فى امان الله
الاقى مى نازله من ع السلم وايديها مليانه دم
وبتعيط
والعيال ساندينها
مالك يا مى فى ايه ؟
الحقنه يا سمر آآآآآآآآه مش قادره
الدم دا من الحقنه :huh:
اه والله انا ايديا مش حاسه بيها آآآآآآآآه

***
انا كنت رايحه اليوم دا ومقرره انى هاخدها يعنى
اهى حقنه تفوت ولا حد يموت
لما شفت المناظر دى
قلت دانا اموت اهون والله
وقررت انى مش هاخدها ولو هيجيلى الحصبه الفرنسيه مش الالمانيه كمان
ساعتها افتكرت
علاء ولى الدين فى فيلم الناظر اما كان خارج بالمظاهره من المدرسه
:D
ايه البواخه دى
لف وارجع تانى
ياسلام يا سلام يا سلام

***

رجعت البيت حكيت لخالو
ادانى درس فى الايجابيه
وان انا كدا بتصرف بطريقه سلبيه والكلام الجميل دا
وقالى تروحى الكليه الصبح تاخدى الحقنه
حاضر يا خالو

***

ريهان هى الحقنه دى بجد بتوجع؟
بتوجع ايه يا بنتى دى زى شكه الدبوس والله دا العيال بيدلعوا
ربنا يطمن قلبك يا شيخه

***

المهم بقى انى اخدتها
وسبحان الله محستش بأى حاجه بتوجع خااااااااالص
لدرجه انى كل لحظه كنت بقول
( يمكن هتوجعنى كمان شويه )
( أكيد هتوجعنى دلوقتى )
( مهو مش معقوله مش هتوجعنى )
عدى ساعتين والحمد لله مفيش أى آثار جانبيه

اليوم دا بقى
اتعلمت حاجه لو كنت قعدت سنين مكنش اتعلمتها بالسرعه دى

اتعلمت انى

( مش هبنى حياتى على اساس تجارب الآخرين )
ومش هتردد انى اعمل حاجه لمجرد ان حد قالى انها مش كويسه
لازم اجرب
لازم اعيش المواقف بنفسى
لازم ابنى حياتى بتجاربى انا مش هما
مفيش مشكله انى اتعلم من تجاربهم او احطها فى بالى وانا بتصرف
لكن المشكله فعلا انى اعتمد عليها اعتماد كلى واتبنى نفس آرائهم من غير تجربه
واستسهل ان هما مروا بنفس الموقف واستخسر انى افكر فيه بعيد عنهم


وكانت هى دى الحاجه العظيمه اللى اتعلمتها
:(




6 comments:

منة النادري said...

انا قولت مكسفكيش
واسيبلك تعليق

.....

بجد
درس مفيد جدا


وعايزة اضيف عليه حاجة

ان لازم قبل ما اقول رايي لازم اكون فاهمة كويسة ولا ازى اكون قريت

عشان اقول رأيي

- ان الواحد مش يصدق كل حاجة ولازم يجرب عشان يكون وجهة نظره هو

لان كلام الناس مبني على خبراتهم وتجاربهم وخلفياتهم

وفعلا الاراء بتختلف

بجد

عجبانى اوي المدونة وحاسة انها تنفع تبقى قصة للأطفال الصغيرة

حلوة اوى

سمـــر مــاهر said...

فيكى الخير والله يا منه
صاحبه واجب

انا معاكى فى رايك اننا لازم نكون فاهمين كل حاجه بنعملها

نورتى البلوج

Anonymous said...

معاكى كويس اوىىىىىىىى فى اننا لازم نجرب احنا ونعيش المواقف ونتحمل تبعتها كمان....تعرفى كنت زمان بخاف اتعلم التفصيل لانه بيقولوا عليه صعب وكده وقعدت فتره معقده منه لكن لما جربتوه لقيتوه صدقا حلو اوى ....
أضافه بقه لكلامك انا اتعلمت حاجه مهمه وهى اننا مش ندى للى ادامنا انطباع سلبى على حاجه اتعلمنها لانه ممكن هوا يدى فيها اكتر مننا

ربنا يعزك على كلامك يا سمر

هبة مدكور said...

سمورتى حبيبتى
ازيك
فكرتينى بالذكريات
بس انا مسألتش
انا دخلت بقلب جامد وكنت واقفالهم على الباب اصلا لما يبدوا عشان وقفش فى الطوابير العجيبة اللى كانت بتقف
ودخلت اصحابى معايا
واديتها دراعى ومسكت فى صحبتى وغمضت عينى ولما خلصت مكنتش مصدقة هو كده خلاص يعنى ولا ايه
طلعت حقنة عبيطة اوى
موجعتنيش خالص
الحمدلله

امال سامي said...

عندك حق يا سمور
:)
بس انا محبتش اخد الحقنة لسبب مختلف

لكن فكرة اننا نخوض التجربة بنفسنا دي عندك حق فيها اوي
ومعرفتش معناها
غير اما خضت تجارب الناس حذرتني منها
:)
بس مفهمتهاش ولا حستهاش
إلا لما دوست انا فيها

انا مش معاهم said...

http://dr-saif.blogspot.com/2009/05/blog-post.htmlاحلي يوم في حياتي جديد سيف مش معاهم