Tuesday, June 3, 2008

ســــمر عملـــــت نصيبـــه


تبدأ حكايتنا بخروجنا من الامتحان يوم الحد
ركبنا المترو انا وهبه ونهله
وطبعا طبعا نهله طول الطريق واجعه دماغى بحكاويها عن المسلسلات الكوريه وانها بقت تحب الكوريين اوى وناويه تتعلم كورى كمان


..........................

المفروض انى هروح على خالو لان عندى امتحان تانى يوم
وما ادراكم يعنى ايه انى هروح عند خالو
يعنى تفضل تطلع في السلم لحد ما نفسك يتقطع
وتحس انك جالك اعراض تعب متكرر _ الله يمسيك بالخير يا دكتور شريف _

*****

اتغديت انا وامينه مكرونه بالبشاميل وسلطه ولحمه وملوخيه

*****

امينه انا هدخل انام وصحينى سبعه
اوك؟
اوك

***

سمر قومى الساعه سبعه
هقوم اهه خلينى شويه

سمر قومى الساعه سبعه وربع
حاضر يا امينه قايمه اهه

سمر قومى الساعه سبعه ونص
يووووووه خلاص قمت

***
بدأت اذكر في الاوضه
خالو كان نايم
صحى سلم عليا
قالى اخرج اذاكر في الصاله

لان النور في الصاله اقوى

لا يا خالو خلينى هنا
يا بنتى اخرجى ذاكرى بره دانا شايفك بالعافيه
لا والله انا مستريحه
طبعا زعق
حاضر يا خالو انا قايمه اهه
وخرجت زى القطه ذاكرت بره
امينه طبعأ اتريقت عليا وقالتلى ناس مبتجيش غير بالصوت العالى
لان هى كانت بتتحايل عليا اخرج

*****
امينه قاعده ع الكمبيوتر
كل شويه صوت الماسنجر
طالع نازل طالع نازل طالع
اللى دخل واللى خرج اللى خرج واللى دخل
انتى يا تحفه وطى صوت الكمبيوتر الماسنجر صوته بيعذبنى
حاضر خلاص اهه

*****
طنط عملتلنا لمون وشربناه
جابت بيبسى وشربناه
قطعت كنتالوب وكلناه
حضرت العشا وفرمناه
وانا اكلت كنتالوب تانى بس امينه مكالتش :D
بصراحه ليها حق انا اللى مفجوعه

كل دا انا وامينه بس ......من 8 ل 12

حكيت لامينه لما نسرين كانت بتيجى تقعد على الكمبيوتر بعدى وتقولى بحس انه كان في وحش عملاق قاعد هنا
من كميه الاكل والعصاير واللب اللى بتبقى جنب الكمبيوتر
****

جت الساعه 12

*****

يالا قومى
اقوم ايه مش قايمه
قومى يا امينه متستعبطيش
مش هقوم يا سمر

خناقات طبعا ع الكمبيوتر
لقيت نهله داخله ع الماسنجر بتاع امينه

نهله انا سمر
انتى قاعده بتعملى ايه يا نهله ؟
مش وراكى امتحان

___ ركزوا معايا في ذكاء نهله في الحته الجايه _

سمر هو في حاجه اركز عليها
انا مش معاكوا يا نهله

ايوا يا امينه انا عارفه انا بكلم سمر

نهله انا سمر اللى بتتكلم انا بقولك مش معاكوا

في حاجه طيب اركز عليها

يا بنتى والله العظيم ما معاكوا انا صحافه وانتوا اذاعه

طيب بصى

في حاجه اركز عليها؟

يخربيت اليهود يا نهله يا بنتى انا مع د هناء انتوا حد تانى

_ امينه طبعا قاعده فطسانه من الضحك علينا _

لقيت نسرين اختى داخله

اختى عملت ايه في الامتحان يا بنت
اختك مين
اختى سمر اللى عندكوا

سمر !!!! ( طلعوا سمر من التلاجه يا رجاااااااااااله )

****
خلصنا فقره الماسنجر
******
قريتى الكتاب اللى بعتهولك يا امينه
بتاع الرجال من المريخ والنساء من الزهره؟
اه
اه قريته جميل اوى

*****

امينه هو دا الفجر ؟؟؟
لا دا اذان قبل الفجر

امينه هو دا الفجر ؟؟
لا دا اذاان قبل الفجر


امينه
هو دا الفجر ؟؟
لا دا اذاان قبل الفجر

عاوزه انوه بس
ان امينه دى عباره عن ال blood
اللى بيمشى في شرايينى واللى القلب بيضخه للجسم كله

سمر دا الفجر على فكره
بجد ؟
اخيرا
صليت ونمت وخالو صحانى وفطرت وشربت اللبن ولبست وخرجت وقابلت السيسى ومى في المترو وروحنا الامتحان

********************************


كوووووووووووووووووووووووول دا كوم واللى جاى كوم تانى خاااااااااااااااااااااااااااااااااااااااااااااااالص


الامتحان في ماده الرأى العام
الماده اللى انا جبت فيها 4 من 30 في الميد تيرم
وتقريبا الدفعه كلها الا من رحم ربى جايبين درجات منيله
الدكتوره كانت بتنتقم مننا عشان نرفزناها في محاضره


الماده بتنقسم بين دكتوره راجيه _ ربنا يسامحها بقى جوزها لسه متوفى _ ودكتور ه هناء

دخلت الامتحان
بفضل الله جاوبت كويس اوى

*********************

نيجى بقى للنصيبه اللى انا عملتها


اختكم هتتفقع من ساعه ما عرفت انها جايبه الدرجه دى

كانت هتصاب بسكته قلبيه لما شافت في ورقه الدرجات درجتها

بس ان جيتوا للحق
اطمنت شويه لما لقيت اسامه الرشيدى جايب 3
ومحمد عبد العزيز جايب 2
_ لمؤاخذه يا جماعه يعنى _

احساس حلو لما تحس ان في حد وراك
حسيت انى متفوقه على راى اسماء


نيجى للمهم
انا خلصت الامتحا ن

وقاعده اقول
اكتب ولا مكتبش

يارب اكتبها ولا مكتبهاش

ياااارب اعمل ايه

ممكن تودينى في داهيه لو كتبتها

اعمل اييييييييييييه


المهم بعد تفكير طويل قررت انى اكتبها في ورقه الاجابه



رساله خاصه

في الحقيقه لقد ترددت كثيرا قبل كتابه هذا الكلام
فأنا لا ادرى ما هى عواقب كتابه رساله كهذه فى ورقه الاجابه

ولكن لولا شده ايمانى بان د هناء ستقدر ما اشعر به ما كنت شرعت في كتابتها

كنت اريدها ان تصل الى دكتوره راجيه ولكنها لم تعط لى الفرصه ولم تعطها لاحد من زملائى

انا لا ادرى ما سر الدرجات المشينه التى اخذناها في امتحان نصف التيرم

هل هذا جزاء الاحترام والتقدير ؟
ام انه جزاء حضور جميع محاضرات د راجيه؟؟
ام انه جزاء المذاكره والبحث في المراجع والكتب للتزود بالمعلومات ؟؟

لم نؤخذ بذنب غيرنا ؟؟؟

يقف الكلام على لسانى فانا لا اريد ان اقول ما يؤخذ على

وفى النهايه

اكن لكِ كل الاحترام والتقدير

نسيت ان اقول ان الصفر كان اكرم لى من هذه الدرجه لاننى في هذه الحاله كنت سأصبح متأكده من ان دكتور راجيه لم تفتح الورقه ولم تر اجاباتى ولكن مجرد انها اعطتنى هذا الرقم فهذا دليل على انها فتحت الورقه ووجدت بها ما يستحق هذه الدرجه




بس والورقه خلصت

فعلا فكرت كتير قبل ما اكتبها
بس انا عملت اللى عقلى وصلنى ليه
فعلا كنت مفروسه

تروح الماده متروحش بقى

المهم انى استريحت



ومكنتش بطلب اى حاجه على فكره في الرساله
مجرد تعبير عن احساس

لو لقيتونى في يوم محطوطه مكان الحرف الواقع في اسم الكليه
اعرفوا انه بسبب ماده الراى العام

وانا هقوم بقى علشان شروق واقفه بتتنطط جنبى
_ الكائن اللى فى الصوره فوق _
عاوزانى العب معاها كوتشينه

سلام عليكم

21 comments:

Anonymous said...

مبروك عليكى مكانك الجديد يا سمر يا ماهر
صحيح
أنتى متأكدة إنك تبقى خالة الكائن اللى فى الصورة
سبحان مغير الأحوال
:D

سمـــر مــاهر said...

اسماء السيسى

اهلا يا خفى

منوره المطرح والله :D
يا بنتى شروق دى مجرد عينه من اللى عندنا

تعالى وانا اعرفك عليهم طفل طفل
ربنا يرزقك ببنوته زيها يا سوما
واجى اقولك انتى ازاى تبقى ام العسل دى

Anonymous said...

:D

خلود

حلاوة روح said...

ياسلام على الفضيح اللى عملتيها للناس يا سمر
يعنى مكتفتيش انهم عملوها ع المنتدى جيتى انتى كامن هنا وفضحتينا
المهم مش تخافى
وسمر معملتش نصيبة ولا حاجة
ان شاء الله خير
خير ومش تخافى ولا تقلقى
بس قوليلى انتى جبتى الجراة دى منين انك تعملى كدا فى ورقة الاجابة ؟؟؟
دا انا بخاف وبقلق اوى لما اكتب فى اول كل امتحان كلمة جاوز الظالمون المدى وبحس انى عملت نصيبة
هههههههه

mohamed said...

مكنتش أعرف يا سمر إنك بالبلاغة دي :))

يلا علي البركة وهتبقي إني المشنوق أعلاه .. سمر

إبقي طمنينا بقى لما يجي الرد علي رسالتك

وربنا يوفقك في بقيت الأمتحانات من غير رسائل

الطلحاوى said...

انتى غلطانة

كان لازم امضاء فى اخر الورقة كده

سمر ماهر

عشان الست بردة ما تتعبش نفسها وتفك اللزقة عشان تعرف مين الى كاتب

:D

Anonymous said...

انا عاوزة الكتاب ده

أسامة الرشيدى said...

طب ليه الفضايح
على العموم انا لو كنت عرفت نتيجة أعمال السنة بتاعتى قبل الامتحان كنت كتبت كلام اكتر من كدة بكتير
دى حتى مستخسرة فيا الصفر
كاتبة لى شرطة

سمـــر مــاهر said...

شاعر كليه الاعلام
محمد خالد

انت بتكتب جاوز الظالمون المدى برده فى الامتحان
:D

طيب كفايه احنا


محمد عبد العاطى

الحمد لله الامتحانات عدت من غير رسايل
بس جبت فى اعمال السنه للراى العام
14 ونص
الله اعلم بقى هعدى ولا مش هعدى

هشام طلحه
تصدق وتؤمن بالله

انا كنت فعلا هكتب فى اخر الرساله امضاء باسمى
لكن على اخر لحظه ادركت انها ورقه امتحان مش تلغراف
انت عارف حتى انا مردتش اكتب الدرجه بتاعتى علشان ميبقاش فى اى اشاره انى قاصده اعرف نفسى

يالا
منفسيش بصراحه اخد كورس صيفى


الحد اللى عاوز الكتاب
هرفعه دلوقتى ان شاء الله


اسامه الرشيدى
او كما اطلقت على نفسك اسامه شرطه
:D
انا فاكره فى ماده قبل كدا كنت جايبه شرطه برده
ولما روحت للدكتور قعد يحلفلى اد كدا انه مصححش ورقتى وانى محضرتش الامتحان اصلا
وانا مصممه انى حضرت
ادانى الورق كله دورت فيه على ورقتى لحد ما لقيتها
وكنت جايبه امتياز
اعتذرلى وادانى درجه زياده عشان كنت بعيط

:D:D
فشوف حظك كدا مع دكتوره راجيه

سمـــر مــاهر said...

وادى لينك الكتاب

http://rapidshare.com/files/121669440/_A7__1604____1605___1606____1575___1604___1605___1585___1610___1582____1608___1575___1604___1606___1.html



خلود عصام
:D :D

سمـــر مــاهر said...
This comment has been removed by the author.
Mai_Jeneen said...

بس أظرف حاجة يا سمر انك ماكتبتيش اسمك في الورقة بس كاتبة الموضوع كله على فضاء الانترنت :D

يعني الدكتورة لو عندها اي نوع من أنواع التعامل مع التكنولوجيا مش هتحتاجي منها زرار كيبورد : D



صحيح ... أمينة بنت خالك في طب ؟؟

سمـــر مــاهر said...

لا مش مصدقه

والله العظيم مش مصدقه عنيا

جنين بحالها هناااااااااااااا
يا بنتى انا مش سيبالك شعر مقرتوش ليكى على شمساوى

انا رحت فين
قميص مدرستى كان كاروهات
خواطر بنوته عاوزه تحب بجد
وغيره وغيره

وعلملالك ملف على الكمبيوتر فيه اشعارك


حقيقى فرصه سعيده
بالنسبه لامينه بقى
فهى اه فى طب

وصاحبتك كمان

:D

يا محاسن الصدف فعلا

ronnata said...

بصى يا بنتى هى مش نصيبة اوى
اديكى عبرتى عن الى جواكى و عملتى الى كنتى عاوزة تعملية
لانك لو كنتى خرجتى بدون ان تكتبي رسالتك دى كنت ىهتندمى
و سيببها على الله
هتتعلقى فين بالظبط ربنايسهل
بس ابقى قوليلنا قبلها

blue-wave said...

انتى مجنونه يا بنتى؟
حد يعمل كدا فى ورقة امتحان؟
انتى مجنونه فعلا على فكرة

سمـــر مــاهر said...

تصدقوا عديت

HeBa SaKr said...

مبروك يا سمرمر على النتيجه
اهم حاجه اننا عدينا
الحمد لله:)

سمـــر مــاهر said...

اه طبعا يا بنتى

ربنا يخليها ويكرمها ويرزقها بالذريه الصالحه ويعزها ويدخلها الجنه
دكتوره هناء

تستاهل بوسه والله
انا لما هشوفها هبوسها
:D

محمد شوشة said...

سلام عليكم
انا نفسى أسأل س}أل واحد اونلى

انتوا بتصبروا تكتبوا كل ده

ازاى!!!!!!!!!!!!!!!!!!!!!!!!!؟
ارجوا الرد

ورد الزيارة

همسة قلم said...

ههههههههههههههه

مش ممكن

انا اي نعم اعرف انه الصحافة بتجنن الطلبة لكن مش للدرجة دي ياسمر

رسالة خاصة للدكتورة في ورقة الامتحان

انتي مش منكن :D

فكرتيني بأيام زمان والله يامسر

ايام الرأي العام والعلاقات الدولية والمقال والتحقيق والاخراج الصحفي والذي منه

ياللا اهي ايام :)

سعيدة جدا بالعرف على مدونتك ياسمر

وبالمناسبة ياريت تبقى تقوليلنا على درجة المادة دي بالذات :D

دمتِ بود

Anonymous said...

feedurl
tech topics
tips
androd tips
games
news feed
geek
zetek
top 100 wesite