فــرحـــه متتوصفـــش

أمى

اختى

زوج اختى ( ابن خالتى برده

خالتى

زوج خالتى

هيطلعوا الحج السنــــــــــــــــه دى

انا سعيده جدااااا

مش متخيله ازاى العدد ده كله يتجمع مره واحده

لا وكلهم فى مكان واحد

يعنى هيبقوا مع بعض طول الحج

بقول لماما انتوا مش طالعين تحجوا انتوا طالعبن رحله

:D

لا وخالتو كانت هتطلع السنه الجايه

شويه محايله من ماما بقى وظبطوا الموضوع\

خالو كان قاعد امبارح بيكلم ماما

هو حج السنه اللى فاتت

كان بيحكيلها

بيقولها

اروع لحظه ممكن تمر عليكى فى حياتك

لحظه وقوع بصرك على الكعبه

يااااااااااااه

سعاده الدنيا بحالها مش هتكفيكى

ولا يوم عرفات قبل الغروب بساعه

كم رهيييييييييييييب من الناس

تحسى انك فى يوم القيامه

وصوت البكاء عامل زى الزلزال

فاضل على الغروب ساعه

كله عاوز يلحق

وبيحكيلها على رمى الجمرات

بيقولها اصعب مرحله فى الحج

كان واحد جنبه بيرمى الجمرات

وبيرفع ايده بقى بكل قوته

ودب

فى عين خالو

بيقولها انا حسيت انى اتعميت

:D

بقول لماما

اول عيد يعدى علينا من غيرك انتى وبابا

:)

تانى حاجه بقى مفرحانى برده

ان ماما خلاص سوت معاشها

ومش هتروح الشغل تانى

يعنى هبقى انا وهى

home alone

وهتساعدنى فى شغل البيت

:D

وهتزودلى الرز عشان اخويا ميتريأش عليا ويقولى دا رز ده ولا عجينه

:)

( بس والله امبارح اول يوم يعترف ان الرز فعلا لا يعلى عليه:D

اخر حاجه بقى واحسن حاجه

بعد المحايلات والمداولات والمؤتمرات

وتقبيل الايادى

وكنس الشقه مرتين فى اليوم بالمكنسه ام دراع مكسور

وافقت ماما

ووعدتنى

انها

هتتطلعنى

مع

خالو

العمره

السنه

الجاااااااااااايه

:D:D:D:D

قلبى هيقف من كتر الفرحه والله

الحمد لله

الحمد لله

فلنتعلم من يوسف عليه السلام

السلام عليكم ورحمه الله وبركاته

بدايه بعتذر عن حاله الخمول اللى فى المدونه

الكمبيوتر عنده دور سخونيه ولفيت بيه على الدكاتره كلاتهم

وامى حالفه تلت ايمانات مهى دافعه مليم لتصليحه تانى

( مش هتصلحه اه بس هتجيب واحد جديد :D)

ومستلفه اللاب بتاع جوز اختى

والسى بي يو بتاعه خالى

المهم

ندخل فى الموضوع عشان بنت خالى واقفه بتذلنى

:D

نجيب بس المصحف ونفتحه على سوره يوسف

آيه

100

اللى هى

بسم الله الرحمن الرحيم

وَرَفَعَ أَبَوَيْهِ عَلَى الْعَرْشِ وَخَرُّواْ لَهُ سُجَّدًا وَقَالَ يَا أَبَتِ هَـذَا تَأْوِيلُ رُؤْيَايَ مِن قَبْلُ قَدْ جَعَلَهَا رَبِّي حَقًّا وَقَدْ أَحْسَنَ بَي إِذْ أَخْرَجَنِي مِنَ السِّجْنِ وَجَاء بِكُم مِّنَ الْبَدْوِ مِن بَعْدِ أَن نَّزغَ الشَّيْطَانُ بَيْنِي وَبَيْنَ إِخْوَتِي إِنَّ رَبِّي لَطِيفٌ لِّمَا يَشَاء إِنَّهُ هُوَ الْعَلِيمُ

الْحَكِيمُ

الايه دى سبحان الله

فيها شويه معانى للقيم والاخلاق

والحب والود والغيره ومراعاه شعور الاخرين

وحاجات كده مش ممكن

مثلا فى الجزء ده

وَقَدْ أَحْسَنَ بَي إِذْ أَخْرَجَنِي مِنَ السِّجْنِ

مفيش اختلاف ان افضل احسان بالنسه لسيدنا يوسف لما ربنا خرجه من الجب

وافضل بكتير من لما ربنا سبحانه وتعالى اخرجه من السجن

هنا نلاحظ مراعاه شعور الاخرين

عشان ميفضحش امر اخوته ادام ابيهم

وميفكرهمش باللى هما عملوه فيه\

لما رموه فى الجب

فضل انه يذكر خروجه من السجن عن خروجه من الجب بالرغم من ان الاخيره افضل بمراحل

حاجه تانيه برده فى نفس الايه

هنا

وَجَاء بِكُم مِّنَ الْبَدْوِ مِن بَعْدِ أَن نَّزغَ الشَّيْطَانُ بَيْنِي وَبَيْنَ إِخْوَتِي

احسن من كده حب وود عمرى ما شفت

يعنى لما حد فينا بيعمل حاجه لحد

طول عمره يفضل يذل فيه

وفاكر لما عملت معايا كذا

ولما قلتلى كذا

هنا سيدنا يوسف رمى كل شىء على الشيطان

كان ممكن يقولهم من بعد اللى عملتوه فيا

وفاكرين لما رميتونى

ولما كذبتوا على ابيكم

سبحان الله

حمل الشيطان ذنب كل اللى حصل

حاجات بسيطه لو تبقى موجوده فى تعاملاتنا

هيبقى لامتنا شأن عظيم

وهنبقى ناس مختلفين نهائى

لما يبقى العرف السائد بينا هو الحب والوئام

لما نسامح بعض

ونخاف على مشاعر بعض

مش نتخنق من بعض

لا وتوصل اننا نقتل فى بعض

كنا زماااااااان بننادى بأمه عربيه موحده

وازاى يبقى العرب مشغولين كده عن بعض

ولازم نبقى ايد واحده ونقف ضد المستعمروكل واحد يحول ينهب منا حقنا

فجأه نلاقى ان افراد الشعب الواحد والبلد الواحد واللقمه الواحده واللغه الواحده

هما اللى بيقتلوا فى بعض

والمستعمر واقف هيفطس على نفسه من الضحك ومنشكح اوى

(ولا قصدى فتح ولا حماس انا بعيد يا بيه

يبقى راح فين الحب

انا متأسفه

لازم اقوم حالا لان شويه هلاقينى انا والسى بى يو من البلكونه ع الشارع

سلام عليكم

التاج الاول

الحمد لله خلصت

دا تاج وصلنى من المجاهده

واول تاج على المدونه المهجوره دى



نبتدى بقى



استعنا ع الشقا بالله


من هو:أحب شخص لقلبك فى الدنيا؟



امى

احلى حاجه فى حياتى



انسان مستعد تضحي بحياتك –ركز فى كلمة حياتك- عشانه؟

حصلت قبل كده



كانت ماما برده

كانت هتغرق وانقذتها




اسم اخر حب(حتى الان)



محمد

رسول الله



الحمد لله وصلت للمرحله دى



كنت دايما بدعى انى اوصل لكده وبفضل الله وصلت



( حمداا لله على السلامه



نسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

لا اله الا الله

ودا من ايه

على العموم يعنى مش دى طبيعتى فى القتل

انا ليا اساليب تانيه

وانا فى الخدمه دايما

اتصل على

0900

وانا هلم الرجاله واجى

ما هو :اسم أجمل كتاب كتبه بشر قرأته ومحتفظ به حتى الان

الله



عندى كتاب اسمه

اغاثه الامه بكشف الغمه

الكتاب ده دمااااااااااار

للمقريزى



كان عند خالو من ايام الدراسه بتاعته

من 30 اربعين سنه كده

والكتاب يعينى متبهدل وحالته فظيعه

بس عاجبنى اوى اوى اوى



اسم كتاب-كتبه بشر برضة- انت متعلق بيه وبتقرأه كل فترة؟



تقريبا نفس الكتاب

اصله طويل اوى وكل فتره لما اقرأ حاجه



ممكن نقول برده كتاب السيره النبويه

لابن هشام

اهم جهاز منزلى انت متعلق بيه او بتستخدمه كتير ؟



الخلاط

بعد اللى ميتسماش طبعا



شىء تحس بالراحة النفسية عندما تنظر اليه



والله السؤال ده غلبنى



بس يعنى ممكن نقول الاطفال



مكان تحس بالراحة عندما تدخله ؟

اوضه بابا وماما



بالرغم من انى بدخلها فى اليوم اكتر من عشروميت مره



بس نقول ايه بقى



اجمل مدينة زرتها داخل مصر



مرسى مطروح



ما شاء الله



سبحان الخالق



أجمل مكان طبيعي رأيته داخل مصر؟

ممكن نقول شاطىء عجيبه فى مرسى مطروح برده



تبارك الله

روعه



انا كاتبه اسمى هناك على فكره

اول جبل على ايدك الشمال



نوع هاتفك المحمول؟

نوكيا

المساحة التى تشغلها المواد الاسلامية على جهازك ؟

والله مش كتير



انا لما بحب اسمع حاجه بسمعها اون لاين من على النت

لكن الحاجات اللى على الجهاز مش كتير



نفس المساحة السالف ذكرها فى قلبك-الاجابة لنفسك عشان الرياء يا اخواننا ؟



طيب ماشى

أهم هدف انت واضعه لحياتك دلوقتى

انى احفظ كتاب الله


صف ما يأتى :شعورك لما بتسمع كلمة مصر؟



بدعيلها ربنا يصبرها علينا

بس بحبها والله

شعورك لما بتسمع كلام عن اليهود

ربنا ما يوريكوا

صدق الرحمن

ولتجدنهم احرص الناس على حياهِ

شعورك لما بتشوف ظابط شرطة ؟

عادى مبحسش بحاجه بصراحه

شعورك لما بتشوف الكناس العجوز فى الطريق ؟



بشكر ربنا على النعمه اللى انا فيها



بالمناسبه بقى

واحد بيكنس دايما ادام البيت عندنا



فى الشارع يعنى



فماما دايما وهى نازله بتديله مبلغ

فهو كان بيقولها انه كان مسيحى واسلم وهى طبعا بقت تزود المبلغ

تانى يوم اكتشفت انه كذاب

وانه ولا كان مسيحى ولا حاجه



ومن ساعتها

ايديها مبقتش تتمد فى الشنطه



لمن ترسل هذا التاج ؟؟

فلسطينيه الهوى مصريه الارض (ايه

مطبات (محمد رفعت

على فكره فى اسئله كتير انا مجاوبتش عليها

اصل دى المره الرابعه ابعت البوست ده

كل مره كان يحصل حاجه

ولذلك انا مليت منه

بس خلاويث

سلام عليكم